സ്വപ്നം
ഞാന്‍ ഒറ്റ.
വെയിലില്‍
കടല്‍ കണ്ടു
നില്‍ക്കുന്നു.
കടല്‍ എന്നെ
പച്ചക്കണ്‍കോണിലൂടൊളിച്ച്
നോക്കി നില്‍ക്കുന്നു.
തിരത്തളളലില്‍ ഒരു പാറക്കൂട്ടം
നുരഞ്ഞു ചിതറുന്നു.
യാത്ര
കാട്ടുപച്ച
കുടിച്ച് വീര്‍ത്ത്
അടഞ്ഞു, കണ്ണുകള്‍.
ഉറക്കത്തില്‍
നിന്റെ കണ്ണിലെ
കാടിളകി വന്നു.
ലഹരി
ചുവന്ന വീഞ്ഞിനേക്കാള്‍
ലഹരി, നിന്റെ കണ്ണിലെ
ഹരിതാഭമായ വീഞ്ഞിന്.
ഉള്ളില്‍, ചില്ലുപാത്രങ്ങളുടഞ്ഞ്
പച്ച ചിതറുന്നു, നിറഞ്ഞാടുന്നു
പീലികള്‍ നാലുപാടും.
കിണര്‍
അറിയാതെ
വീണു പോയി
ആഴങ്ങളില്‍.
ഏറെ നാളായി
പായല്‍ പുതഞ്ഞു
കിടക്കുന്നു.
തുരുത്ത്
പച്ചയുടെ
രണ്ട് തുരുത്തുകള്‍.
തോണി വേണ്ട,
പാലവും.
കുടുങ്ങിക്കിടക്കണം
പച്ചയായൊടുങ്ങണം.
